ഇനി ഓൺലൈനിൽ ക്രിക്കറ്റ് പഠിക്കാം. പരിശീലനവുമായി വീരേന്ദ്ര സേവാഗും സംഘവും.
പ്രമുഖക്രിക്കറ്റ് താരം വീരേന്ദർ സേവാഗ് ഇന്ത്യയിലെ ആദ്യത്തെ പരീക്ഷണാത്മക ക്രിക്കറ്റ് പഠന ആപ്പ് അവതരിപ്പിച്ചു. 'ക്രിക്കുരു' എന്ന പേരിലാണ് ആപ്പ് പുറത്തിറക്കിയത്. ഉപയോക്താക്കള്ക്ക് വ്യക്തിഗതമായ പഠന അനുഭവം പ്രദാനം ചെയ്യുക എന്നതാണ് ക്രിക്കുരുവിന്റെ ലക്ഷ്യം. നിര്മിത ബുദ്ധിയിലധിഷ്ഠിതമായ (എഐ) ക്രിക്കറ്റ് പരിശീലനമാണ് ആപ്പിൽ ലഭിക്കുക. ഓരോരുത്തര്ക്കും വേണ്ട കരിക്കുലം സെവാഗും മുന് ഇന്ത്യന് താരവും ബാറ്റിങ് പരിശീലകനുമായ സഞ്ജയ് ബംഗാറും ചേര്ന്ന് വികസിപ്പിച്ചിട്ടുണ്ട്.
രാജ്യത്തെ ക്രിക്കറ്റ് പരിശീലന അനുഭവം പുനര്നിര്വചിക്കുകയെന്ന ലക്ഷ്യത്തോടെയാണ് സെവാഗ് ആപ്പ് നിർമിച്ചത്. ഇന്ത്യയിലെ ക്രിക്കറ്റ് പഠനത്തെ ജനകീയമാക്കുന്നതിനും നിലവിലുള്ള വിടവുകള് നികത്തുന്നതിനുമായി ഒരു ആവാസവ്യവസ്ഥ വികസിപ്പിക്കുക എന്നതും ആപ്പിലൂടെ താരം ലക്ഷ്യമിടുന്നു.
വളര്ന്നു വരുന്ന ക്രിക്കറ്റ് കളിക്കാര്ക്ക് ആഗോള തലത്തിലെ പ്രഗല്ഭരായ പരിശീലകരില് നിന്നും തടസമില്ലാതെ, അന്താരാഷ്ട്ര നിലവാരത്തിലുള്ള കോച്ചിങ് ലഭ്യമാകുന്ന രീതിയിലാണ് പാഠ്യപദ്ധതി രൂപകല്പ്പന ചെയ്തിരിക്കുന്നത്. ക്രിക്കറ്റില് ഒരു പ്രൊഫഷണല് കരിയറിന് ആവശ്യമായ നൈപുണ്യം നേടുന്നതിനായി കുട്ടികളോടൊപ്പം മാതാപിതാക്കൾക്ക് കൂടി പങ്കാളികളാകാനുള്ള അവസരവും ക്രിക്കുരു ഒരുക്കുന്നുണ്ടെന്നും സേവാഗ് പറഞ്ഞു.
എബി ഡി വില്ലിഴേസ്, ബ്രെറ്റ് ലീ, ബ്രയന് ലാറ, ക്രിസ് ഗെയില്, ഡ്വെയ്ന് ബ്രാവോ, ഹര്ബജന് സിങ്, ജോണ്ന്റി റോഡ്സ് തുടങ്ങി ലോകമെമ്പാടുമുള്ള തെരഞ്ഞെടുക്കപ്പെട്ട 34 പരിശീലകരുടെയും താരങ്ങളുടെയും ക്ലാസുകൾ ആപ്പിൽ ലഭിക്കും. ഓരോ പരിശീലകന്റെയും നാല് മണിക്കൂര് ക്യൂറേറ്റഡ് വീഡിയോ സൗകര്യപ്രദമായി ഉപയോഗിക്കാം. എഐ സാങ്കേതിക വിദ്യയില് തന്നെ പഠനം വിലയിരുത്തുകയും വീഡിയോകള്, സിമുലേഷനുകള് എന്നിവയിലൂടെ പഠനത്തെ സജീവമാക്കുകയും ചെയ്യും. എംസിസി പരിശീലന മാതൃകയില് ഉപയോക്താവിന് സ്കോറും ലഭിക്കും.
രാജ്യത്തുടനീളമുള്ള ആളുകള്ക്ക് എവിടെയായിരുന്നും ക്രിക്കുരുവിലൂടെ ക്രിക്കറ്റ് പരിശീലനം പ്രാപ്യമാക്കാം. പ്രകടനങ്ങളുടെയും അഭിമുഖങ്ങളുടെയും സംയോജനമാണ് ക്രിക്കുരു. അനുഭവങ്ങള് പങ്കുവയ്ക്കാനും കൂടെ പഠിക്കാനും ഇതിലൂടെ സാധിക്കും. ഓരോ ക്ലാസിലും വിപുലമായി മുന്കൂട്ടി റെക്കോര്ഡ് ചെയ്ത വീഡിയോകൾ ഉണ്ടാകും.
ഒപ്പം വീഡിയോകള് താല്ക്കാലികമായി നിര്ത്താനും വേഗത്തിലും ഇഷ്ടമുള്ളത്ര ആവര്ത്തിച്ച് കാണാനും കഴിയും. ഐഒഎസിലും ആന്ഡ്രോയിഡിലും ആപ്പ് ലഭ്യമാണ്. www.cricuru.com ലോഗ് ചെയ്ത് ഒരു വര്ഷത്തേക്ക് വരിക്കാരാകാം. ഒരു വര്ഷത്തേക്ക് 299 രൂപ മുതലാണ് ഫീസ്.